ANTON FILONOV MAVRINAC (Materi na dar)

MESOPŰST Već mísec dân, säkú vëčér, rűšé padële, pinjäte i stăré läte. Zvoné zvónci i šúpi lónci. Sí se maškarăjú i kámpanăjú. Čéra j' bíl mesopűst - - za síh je bil gűšt. Së j' po frítulah dišälo, - stăró i mlădó j' skákälo. Ökolo su hodíli indijănci, grde măškare i kolijănci. Va säkój kűći tánci. Dilílo se j' frítule, jăja i špëh po krijánci i stároj užánci. Sí su píli i nimíli, ónput se umiríli glăvu su ofašäli i Pústa k vrániću posläli. Pőtli nimíla j' dobrä i kamamíla. Čísta j' srédä, ma jőš su níki va koräju: - konăté i kramăjú. Š njími j' i Gűšta i još vävik nősi Mesopűsta. Šál je v oštaríju, aš će čă vă se zlét pa će póć naričúć Pústa zgorët. Zvonäc zvoní: dűmpa, dűmpa, Gűšta sríbje vínő kod púmpa. Tú j' níko vríme stăl, stăl: - se j' mälo zalúlal i zašemetăl. Zvonäc mu j' jače zakámpanăl, ónpűt je zanerăl, i na tlä păl. Tako j' ustăl i zahrhnjăl. Spí Gűšta. Nëgder mu j' päla i bűšta. Zgúbil je i takujín, ma, ní níš va njín. Slína mu cídi z őtprtíh ust, - na njegővón hrbätu círi se ... Mesopűst.

About us

YouTube       GoogleEarth

Druženje na Ričini          27.04.2008.

Nediju 27.04.2008.leta smo imeli naše godišnje druženje na Ričini. Sako leto šetemanu pred prvi maj organiziramo velu feštu na Ričini za si naši člani , prijateji, sponzori i simpatizeri. To nan je idealna prilika da i mi počastimo onih ki nas vavik dočekaju zvelin srcen jis i pit. Isto tako da se si okupimo na jednon mestu i na miru poćakulamo aš kad mi dohajamo pu njih onda vavik moramo žurit i nimamo vrimena ćakulat. Druženje je trajalo od 10 jutro pa do jedno 8 večer, se sej pojilo i popilo a to za nas znači daj fešta uspjela. Došli su nan i dragi gosti zvončarih i drugih udrug ke se bave zmaškarami ča nan je jako drago. Nadan se da ćemo se i drugo leto ovako lipo družit.Ovdi pogjedajte slike napisal: A.Žeželić

Grobnička Kartulina na Google earth        14.04.2008.

Da van čin više dočaramo našu predivnu Grobnišćinu, naš predsjednik udruge Nikola Vrančić-Kolja je napravil "Grobničku Kartulinu". Na kartulini morete pogjedat kadi su po Grobnišćini; turistički biroi, Grobničke Alpe, Nacionalni park Risnjak, Ričina, sa naseja po Grobnišćini, povjesni lokaliteti, muzeji, crikve, groblja, planinarski domi, smještaj-sobe, restorani, kafići. pizzerije, marketi, pekare, banke, pošte, benzinske pumpe, busne stanice, vatrogasci, ljekarne, ambulante, sport i rekreacija, i ono zač je i šal to delat a to su ophodi Grobničkih Dondolaših. Moren reć da sej fanj nabacilal oko toga ali Kolja poveda daj to samo početak i da ima tu još fanj dela. Znači ovo je prva verzija pa kako bude šal daje mi ćemo stavjat nove verzije. Ako ki ima još kakov predlog slobodno nan pošajite e-mail.   Kartulinu se more pogjedat na GoogleEatrh a ki nima toga programa more ga badave znet ovdi. Kad to napravite onda kliknite na "Grobničku Kartulinu" i oprit će van se file va zip formatu i kad ga otpakirate kreće jedna lipa šetnja po Grobnišćini. Koga zanima kuliko traje mesopust va 2009 letu neka pogjeda ovdi "Kalendar 2009-2012 leta" pdf   Usput morete pogjedat prvi i drugi del našega promotivnog DVD-a ča smo napravili još prošloga leta (kliknite dva put na sliku) Promotivni DVD prvi i drugi del na YouTube      Parićal: A.Žeželić

Gostovanje  Bergamo - Italija      02.03.2008.

Bergamo, 02.03.2008. „Sfilata di mezza quaresima“ jedno predivno gostovanji va Italiji za ku puno nas misli kako ju dobro poznamo, a ka nas vavik ponovo iznanadi i ponudi nan nič novo, lipo i nezaboravno. Ovo moje iskustvo, ko želin podilit z vami, ki niste imeli tu privilegiju da ga sami doživite, počinje pred pet let kad san se igrun slučaja našal blizu toga prelipoga grada sjeverne Italije. Mesto z koga ću počet ovu moju prvu reportažu zove se Ponte di San Pietro, blizu Bergama.Vrimej' Korizme, Nedijaj' i ja san potli maše, a prvo obeda šal malo prošećat po tomu slikoviton gradiću. Vaje blizu crikve videl san nikakov plakat od maškar za ki san mislel kakoj' ostal pozabjen od pasanoga karnevala. Šećen ja tako naprvo kad vidi vranića visi tamo još jedan, pa drugi i najzad su me „naješkali“ pa san stal i počel čitat. Nemalo san se iznenadil kad san shvatil da ti plakati uopće nisu stari. Najavljivali su maškaranu povorku za sledeću Nediju !? Prvo ča mij' palo na pamet je bilo daj' Korizma, pa da san va Italiji, srcu katoličanstva i niš mi ni bilo ćaro! Ako ti ča ni jasno, najboje tij' pitat onoga ki zna. Tako san i ja pital domaćini i to malo stariji judi i oni su mi rekli daj' to pu njh običaj već više od sto i pedeset let. Pa konačno ča se ja čudin, kad se Nedije i tako ne broje va korizmeni dani. Da stvar bude zagonetnija taj običaj gaje va još desetak mest po Italiji. Znal san da ča takovoga nemore proć mimo mene i jedva san dočekal drugu Nediju. „Sfilata di mezza Quarezzima“ kako „Bergamaschi“ zovu tu svoju povorku pokazala mij' daj' dostojna sakoga evropskoga karnevela, kako po broju učesnicih, po kvaliteti maškaranih grup' , po broju posjetiocih, po organizaciji, ma baš po semu.Posebna štorija su alegorijske kola. Fasciniraju kvalitetun izrade, s puno detaljih, a sakako i svojun veličinun. Pa ipak mej' najviše oduševila neverovatna veza posjetiocih i maškar va povorki. Gledatelji, a moran reć da jih je sih ras i kolorih, izuzetno teplo i srdačno dočekuju saku grupu, bez obzira od kud dohaja. Naravno, nebin ja bil to ča san, da va sen ton šušuru nis videl i moji Dondolaši. Tad doduše samo va svojoj mašti, ali za ko leto… ki zna? I na moje velo veselji to leto j' došlo ove 2008. Prilika izuzetna. Maškare kratke. Dondolaši željni zvonjave. Još kad san doznal daj' i pu nas nekad Nediju, sredinun Korizme bilo dozvoljeno „feštat“ za izuzetne prilike ( rođenja, kršćenja i dr. ), nestal je i strah od onoga ča će judi reć da zvonimo va Korizmi. Mobilizirali smo se va odboru, kontaktirali organizatori “Sfilate“ udrugu „Ducato Di Piazza Pontida“, i za par dan sej' bilo parićano za krenut na još jedno gostovanje. Ov' put na zapad i za razliku od dosadašnjih revijalnih gostovanja, ov' put smo iskoristili mogućnost te manifestacije i hrabro se prijavili va takmičarski del povorke. Krenuli smo Nediju 02.03.na 2 jutro i nakon kraće vožnje došli na „Šengensku“ granicu. Probudili dežurnoga policajca i nakon „kraćega“ zadržavanja ušli va Evropsku uniju. 48 veselih Dondolaših zajedno z neizostavnun logistikun sretnoj' došlo na ulaz va Bergamo, kadi nas je dočekal predstavnik domaćina i popratil va centar. Tu smo dobili vodića i uputili se va gornji grad ( „Citta alta“ ). Priliku da upozna bogatu srednjevjekovnu povjest staroga Bergama iskoristilaj' jedna grupa Dondolaših, a drugaj' iskoristila jedinstvenu priliku da prezentira stanovnikon Bergama grobničke pjesme i tradiciju na najposjećenijoj šetnici toga grada od 120 tisuć duš'.Moren reć da smo već tu dobili naznake onoga ča sljedi, aš smo bili jako dobro prihvaćeni i nagrađeni za uspješnu prezentaciju. Nakon toga tribaloj' poć ča i pojist. Obed je bil parićan va jednon sportskon objektu.Biloj' dobro i dosita. Nakon kraćega predaha krenuli smo na mesto okupjanja karnevalskih grup.Tu smo se razštrkali i šli pogjedat konkurentske grupe. Moran napomenut daj' naša oprema, a naročito krabuje izazvala velu pozornost i da nan sej' javilo više predstavnicih sličnih manifestacij' 'z Italije ki su izrazili želju da posjetimo i njh, pa verujen da će usljedit novi pozivi već drugo leto. Iakoj' dan bil sunčan i nestvarno tepal ( +22 C ) uru vrimena prvo početka povorke niš ni dalo naslutit da će nas uz oko 2,5 kilometra dugu trasu dočekat priko 60 000 tisuć gledateljih. A dočekali su nas i to prijateljski i teplo koda smo njihovi. I ne samo publika već i mediji, tako da smo imeli priliku va direktnon prenosu reć celoj Italiji par besed kako o Dondolašon tako i o našoj Grobnišćini, Naš nastup je bil solidan. Za te dve i pol ure samo smo va dva navrata kratko predahnuli, a se drugoj' bila „čista“ zvonjava. Moran pohvalit logistiku z vozićen ka ni dozvolila da dehidriramo i ka nan je pomogla da budemo pravi do kraja. Dondolaši nemoran hvalit, njih i njihov nastup najboje hvali prvo mesto ko smo dobili va izuzetno jakoj konkurenciji, ko i iskreno odobravanje sih prisutnih nakon proglašenja na glavnoj pozornici. Trudni, ali zadovojni i ponosni sretno smo se vrnuli doma pondijak 03.03.na 3 i pol zapolnoćun. Ovdi pogjedajte slike napisal: N.Vrančić-Kolja

Gostovanje Yambol - Bugarska      15-16-17.02.2008.

Za nas ni još završil mesopust 2008...... Za nas to ni bil kraj aš smo se zajedno počeli parićevat za putovanje od 1500 km va grad Yambol (Bugarska)..... Yambol Bugarska. Nadan se da će se ovo naše putovanje splatit kad drugo leto dopejemo jednu grupu Kukerih na „Grobnišćinu zvoni“...Ovdi pogjedajte slike.   Celi članak pročitajte ovdi. napisal: A.Žeželić

"MESOPUST 2008"     30.01.2008.

Judi još malo pa gotov mesopust. Je to moguće? Ovo leto nismo ni počeli a već moramo završit..... Ovdi pogjedajte na YouTube našu himnu s likovima z bajke Novina je i to da ćete moć pratit naše snimke ovdi Celi članak pročitajte ovdi. napisal: A.Žeželić

Godišnja izvještajna skupština       02.12.2007.

Va dvanajston misecu, kod i sako leto, udruga Grobnički Dondolaši održala j godišnju izvještajnu skupštinu. Na skupštini su, osin članih same udruge, bili predstavniki.... Predstavjena j i po prvi put pušćena nova pjesma, ku je napisala gospa Zdravka Žeželić-Alić, uglazbil ju j` gospodin Anton Mario Kamenar.(morete ju poslušat ovdi) Celi članak pročitajte ovdi. napisal: A.Žeželić

Dve lipe pjesme            28.11.2007.

GROBNIČKI DONDOLAŠI Kako j' lipo kad o mesopustu gobnišćinun zvone dondolaši po starih užancih ,tirajuć zlo sako to j' od vavik bilo tako. Se su oštarije naše i vino se toči, kraj teple palente i grobniškoga sira grobnišćice mlade, nedaju nan mira. Obahajamo po grobnišćini od sela do sela, nikad se ne strudi naša, kunpanija vela. Kanpanamo kad daž pada i kad bura praši, hote snami, zakantajte z' grobničkimi dondolaši. (poslušajte ju ovdi)  Autor: Zdravka Žeželić - Alić  NIŠ NI BOJE OD PALENTE KOMPIRICE Malo j` stvari na ten svitu Ke ja z gušton neću jist Kad se ja od stola stanen Moj pijat ostane čist Volin ribu ćeš na lešo Na gradele na brudet Volin njoki volin paštu Sarmu, tripe i žgvacet Ako niki pita ča mi j` to najboje Ča mi j` baš po guštu ča pojin najraje Neće mu bit ćaro kad mu vaje rečen Na celomu svitu ča j` od sega slaje Niš ni boje od palente kompirice Ča ju znaju skuhat stare Grobnišćice Aš je naša judi moji mili Si smo jušto na njoj se zgojili Autor: Robert Pilepić Izvođač: Klapa Grobnik uredil: A.Žeželić

Budva- Crna Gora      4-5-6.05.2007.

Ovaj put san najprvo stavil slike aš jih je jako puno a onda pišen tekst. A ča da van rečen. Krenuli smo četrtak večer oko 9 i pol večer z`dva busa Autotransa. Se skupa, ča općinskih vlasti, ča roditejih od dice, ča sponzorih i prijatejih nabrojilo nas se je 90, tako da je bilo društvo za pet. Prvu noć va busu..... Celi članak pročitajte ovdi. napisal: A.Žeželić

Druženje na Ričini     22.04.2007.

Kod ča san van rekal prošli put ovu nediju smo imeli druženje na Ričini za naši člani, prijateji i gosti. Bili su si judi ča nan neč znače va naših velih pohodih, bili su isto tako i prestavnici drugih zvoncarih i festarih  kod i naši prijateji Slovenije.  Desetak dondolaših je već od sobote večer čuvalo mesto i pripremalo ča rabi za velu feštu. Ča da govorin, fešta je bila za deset, se je bilo na svojen mestu i kuliko ja znan ni nikomu niš falelo. Prošlo je kroz celi dan, računan oko tristotinjak judih. Igral se j` nogomet, boće, karte i potezanje špaga, tako da nan je lipše palo to ča smo pojili i popili a moren van reć da j` toga bilo ko za jednu vojsku. Pogjedajte ovdi slike i sami se uvjerite. napisal: A.Žeželić

Grobničke Alpe   23.09.2006.

Kad ste zadnji put i ste kad opće bili na Grobničkih alpah ? Grobničke alpe su van vrhi:Fratar(1.353 m),  Suhi vrh(1.280 m),  Osoje(1.340 m),  Vidalj(1.184 m), Ćunina glava(1.160 m),  Obruč (1.376 m), Hahlići (1.097 m), i Mudna dol.... Celi članak pročitajte ovdi. Napisal: A.Žeželić

Zagvozd " Glumci u Zagvozdu "  01-02.07.2006.

Iznenada smo dobili poziv od TZ. Rijeke da gremo va Zagvozd na otpiranje manifestacije "Glumci u Zagvozdu". Imeli smo samo dva dana da se parićamo ali mi gremo sakamo samo da nan guzica puta vidi. Krenuli smo sobotu na..... Celi članak pročitajte ovdi. Napisal: A.Žeželić

Ivan Brdar Grobniški    03.11.2005.g.

Biž ća, živino, naše meso pust... Grobnički dondolaši . . . Ma od sih tih nimotarij kad poludi se krajen, muško, žensko, mladi i stari, najsrdačnije i najteplije pozdravimo ti naši dondolaši. Aš oni su od sega toga najprvi ča su došli od vele putribe još va one stare vrimena se ovo veselji i nimotarije potekli su od njihova simena. Pokla su došla zvona, zgubil se j' naziv stari, tako da dondolaši, prozvani su zvončari . . .  . . . Ali ti naši stari dondolaši znali su puno put potirat i ono zlo ko j' zapritilo va to starije vrime, Mlečani, Tatari i Turki... i tako su očuvali našu slobodu i pošteno hrvatsko ime. I sada, kad su dani divertimenta, ne pozabite one besede naših starih: Biž ća, živino, naše meso, pust! Pa lipo va koraju pojijmo, popijmo, pa zasopimo, zakantajmo, ma i zatancajmo i ča lipje i veselije proštimajmo ta naš dragi i veseli Mesopust . . .  Autor teksta: Ivan Brdar Grobniški Celi članak morete pročitat Članci o nami  Uredil:  A.Žeželić

Rojeni san Grobničan

Rojeni san Grobničan I otac i mater tu su se rodili I nono i nona su Grobničani bili I si su puno lumpali i pili I veliku su starost doživili Rojeni san Dondolaš I naši pranonići vavik su zvonili I otac i nono su Dondolaši bili I si su puno lomili i pili Za maškarami sakud su hodili Kad zazvone Dondolaši Se se trese se se praši Si kantaju si tancaju Zvonci jako dondolaju Kuda projdu Dondolaši Se se lomi se se praši Teški zvonci kreče škinu Potres trese Grobnišćinu Kad se spuste Dondolaši Prema Riki uz Ričinu Pomest će po Fijumeri I po korzu su prašinu Kad obajdu Dondolaši Se i jednu oštariju Strašit će po Grobnišćini I po Riki mulariju Kad zazvone Grobničani Se se trese od žestine Odvavik su Dondolaši Ponos naše Grobnišćine Rojeni san Grobničan Autor teksta i muzike Rudolf Srića Kantaju i sopu Rudolf Srića i Žarko Žeželić Himnu poslušajte ovdi