Sobotu 13.02.2010.leta na tancih ki se zovu "Grobnička noć" zivučevali smo tombulu ku smo prodavali celi mesopust. Fran Fućak je zivukal si broji a nadan se da ćete baš vi dobit skuter ki je za glavnu nagradu. Zivučeni su ovi broji: 0228, 1706, 0008, 1156, 0147, 0886, 0394, 1303, 0236, 0231, 1134, 0281, 0257, 1001, 0501, 1634, 1628, 1536, 0201, 1278, 0282, 1052, 0289, 0987, 0522, 0296, 1140, 0106. Se nagrade moru se podignut do 01.04.2010. leta Za informacije morete nazvat na 091- 125-9085 (Davor) Odbor "Grobnički dondolaši"
Još na prošlogodišnjoj Grobnišćini zvoni smo znali da ćemo poć na najveći i najstariji karneval tradicijskih maski (zvončarih) na svitu a toj sigurno SURVA va Perniku (Bugarska). Z naši gosti ki su bili pu nas a to su kukeri (zvončari) z Dolne Sekirne općine Breznik smo se lani dogovorili da ćemo se videt 2010 na SURVI i to se j` dogodilo. Tuliko toga nan se j` lipoga dogodilo da neznan od kud ću počet. No ukrcali smo se nas 47 va bus četrtak 28.01. na pol noći i pomalo krenuli put Bugarske. Kod i saki put kad se krene na put od hijadu kilometrih i više ekipa zajedno počme jako feštat a to se j´ dogodilo i ovi put. Jako sost i kantat kadi god se stane pa tako i po Srbiji. Put je dobro prošal uz zezanciju i jako puno smiha. Gospodin Rumen Nikolov z grupe Dolna Sekirna nas je čekal na Bugarskoj granici, (da nebi zalutali) i otpejal nas va mesto z istin imenon kod i hotel Gorna Banya. Va hotelu su nas već čekali gosp. Ivanka Vasileva ka poveda si mogući zajiki i gosp. Andrey Spasov ki poveda engleski, oni će nas pratiti va stopu si ovi dani.(čak su i spali va našen hotelu ča još nigdi nisan videl). Šli smo na večeru jedno 50 metrih od hotela, povečerali zasopli, zakantali, zakartali i šli na zasluženi odmor. Sobotu smo se digli na osan i krenuli put Pernika na prvo prestavjanji. Pozvano je 30 stranih (a od najdaje su bili Kinezi) i 130 Bugarskih grup (pol sobotu i pol nediju). Mi smo nastupali zadnji va stranih grup a naši prijateji prvi od Bugarskih grup, tako da smo se družili i va samoj povorki. Na prestavjanju napravili smo četiri kola i se je prošlo za pet (to se j` videlo po reakciji publike). Potli prvog prestavjanja šli smo na obed i pomalo se pripravjat za drugo prestavjanje a to je samo na pozornici za strane grupe. Kad smo i to obavili šli smo na večeru i parićat se za druženje znašimi prijateji (bar su oni tako rekli). Zakupili su jedan restoran samo za našu i njihovu grupu. Kad smo došli va taj restoran imeli smo i ča videt, puni stoli pit i jist (stvarno su nas iznenadili aš nismo znali da su se tuliko potrudili oko nas). Normalno počela je zabava i red našeg tanca i red njihovoga tanca. Odličnu zabavu su nan priuštili prijateji z Dolne Sekirne (kad znamo da jin selo broji oko 200 stanovnicih). No rabilo je mislet na drugi dan kadi smo još jedanput ponovili kod i sobotu i potli večere smo se parićali za ća. Dondolaši ne gredu nikamo ako ne nauče ili ne vide neč novoga tako da smo šli (makar dosta kasno ) va glavni grad Sofiju na par ur i tek onda put Hrvatske. Kad smo ušli va Hrvatsku prvo smo šli posjetiti spomen dom „Ovčara“ i Vukovar, kadi se još osjeti posledice prošloga rata. (niki ni ostal ravnodušan). Potli Vukovara šli smo prema općini Cernik (Novogradiški) kadi smo već imeli dogovor za nastup. Tamo nas je dočekala cela njihova (Cernička) i naša (Čavjanska) garnitura političarih (načelnici i općinski vjećnici). Šli smo najprvo va Novu Gradišku pozvonit pa va općinu Cenik kadi su judi prvi put va životu videli tako ča na njihovih ulicah i onda na jedan taman parićan obed (govorin taman aš nan je tako dobro sel....). I tu smo kod i obično zasopli malo mi malo oni i konačno krenuli prema doma. Na Čavju smo došli oko desete ure i brzo šli doma na zasluženi odmor. Ovun prilikun se zahvajujen našimi prijateji z Bugarske kod i našimi Cerničani na teplon i srdačnon dočeku. ŽIVIO PUST !!! napisal: A.Žeželić
Mesopust 2010 na Grobnišćini ni počel va 2010 letu nego kod i sako leto redovnun skupštinun udruge Grobničkih Dondolaših ka se je održala 29.11.2009.leta. Na skupštini su tijela udruge dale svoja izvješća ka su sa glasanjen celoga članstva odobrena, dale su se nove smjernice udruge i biral se j` „Naj Dondolaš za 2009.leto“. Ovo leto nominirani za tu nagradu su bili: Branko Fućak (Pašac), Vanja Perić (Podrvanj) i Josip Sudan (Pohum). Si člani udruge su glasali dva kruga (aš ni nijedan član va prvon krugu dobil većinu). Naj Dondolaš 2009. leta je Vanja Perić (Podrvanj). Na skupštini smo prestavili za naših prvih deset let djelovanja i naš prvi broj lista ki se zove „DONDOLAŠ“ a morete ga pročitat i na našoj stranici. Tek kad smo zadovojili se ča se rabi kod udruga mogli smo počet z „Mesopust 2010“ Kod i sako leto počinjemo na blagdan Sveta tri kraja z jednin okupjanjen va Cerniku pu našega zvona. Obisimo zvono prvi pozvoni dondolaš leta i se more krenut. A krenulo j` zajedno sobotu 9.01. zopiranjin mesopusta va općini Čavja i 10.01. va općini Jelenji. Ovo leto po prvi put na opiranju nismo imeli baš sriće ča se tiče vrimena. Jutro smo se skupili napravili kod i sako leto smotru judih i opreme, a daž ni prestajal padat. Čekali smo jednu uricu i kad je prestalo padat krenuli smo. Ni prošlo puno vrimena kad je počel ponovo daž padat i se do kraja ni prestalo. Bili smo mokri do kože, a da su i sikera padale mi bi prošli sa mesta aš nas judi dočekuju i po najvećen dažju. Nedija je pasala va lipšen vrimenu i po običaju smo krenuli z Podkilavca pa Dražice – Pohum – Soboli – Zastenice – Grad Grobnik – Kačani – Lukeži i večera pu MAME va Jelenju. Na Antonju (17.01) smo bili pozvani va Pašac da zajedno s Paščanskin maškarami podignemo pustića i da i va ton kantunu Grobnišćine počme mesopust. 23.01. kod i sako leto do sad šli smo na karneval va Viškovo. Lipo z Jelenja nahodeć priko Kopice nogu- nanogu i dojde se do Viškova. Posebno moran napomenut da od 24.01.i mamo novi prijateji a to su Kukuljanski zvončari. Lani su se okupili, ovo leto su nas zvali da skupa pozvonimo po Kukujanovu i mislin da je fešta uspjela. Nemoran posebno napomenut da ovun prilikun još jedanput od srca zahvajujen na teplemu dočeku sakuda kadi smo bili. Sad smo negdi na pol puta i krećemo dokla god ne završi Mesopust 2010. ŽIVIO PUST napisal: A.Žeželić
Neki bi rekal da ako ni niš novoga na stranici da mi niš ne delamoali to ni istina aš smo va motu ko nikad do sad va ovo vrime. Neznan ni od kuda da krenen.Nediju 26.04.2009.leta napravili smo ko i sako leto do sad godišnje druženje na Ričini. Šetemanu dan pred prvi maj organiziramo velu feštu za si naši člani, prijateji, sponzori i simpatizeri. To nan je prava prilika da i mi počastimo si judi ki nas sako leto dočekaju po selih. Druženje je trajalo od 10 jutro pa do jedno 8 večer, se sej pojilo i popilo a to za nas znači daj fešta uspjela. Došli su nan i dragi gosti zvončarih i drugih udrug ke se bave z maškarami ča nan je jako drago. Nadan se da ćemo se i drugo leto tako lipo zabavit. Celi članak pročitajte ovdi. napisal: A.Žeželić
Da van čin više dočaramo našu predivnu Grobnišćinu, naš predsjednik udruge Nikola Vrančić-Kolja je napravil "Grobničku Kartulinu". Na kartulini morete pogjedat kadi su po Grobnišćini; turistički biroi, Grobničke Alpe, Nacionalni park Risnjak, Ričina, sa naseja po Grobnišćini, povjesni lokaliteti, muzeji, crikve, groblja, planinarski domi, smještaj-sobe, restorani, kafići. pizzerije, marketi, pekare, banke, pošte, benzinske pumpe, busne stanice, vatrogasci, ljekarne, ambulante, sport i rekreacija, i ono zač je i šal to delat a to su ophodi Grobničkih Dondolaših. Moren reć da sej fanj nabacilal oko toga. Ako ki ima još kakov predlog slobodno nan pošajite e-mail. Kartulinu se more pogjedat na GoogleEatrh a ki nima toga programa more ga badave znet ovdi. Uputstva kako ćete to gjedat isto je napisal Kolja a morete jih pročitat ovdi. Kad se to lipo pročitate onda kliknite na "Grobničku Kartulinu" i oprit će van se file va zip formatu i kad ga otpakirate kreće jedna lipa šetnja po Grobnišćini. napisal: A.Žeželić
Za nas ni još završil mesopust 2008...... Za nas to ni bil kraj aš smo se zajedno počeli parićevat za putovanje od 1500 km va grad Yambol (Bugarska)..... Yambol Bugarska. Nadan se da će se ovo naše putovanje splatit kad drugo leto dopejemo jednu grupu Kukerih na „Grobnišćinu zvoni“...Ovdi pogjedajte slike. Celi članak pročitajte ovdi. napisal: A.Žeželić
Napisal: A.Žeželić Autorica pjesme "Tu je jubav moja" ku imate čast pročitat i snimit na ovoj stranici napisala je naša Grobnička pjesnica Vlasta Juretić. Mi smo se malo potrudili da napišemo par besed o njoj:
. . . piše pjesme, prozu i djela za scenska uprizorenja. Dopredsjednica Čakavskoga sabora sa sjedištem u Žminju je drugi mandat i tajnica grobničke Čakavske katedre. Nadalje, glavna urednica je .... ....Do sada objavljene knjige: Z duše moje (pjesme), Zrna (pjesme i proza), Raskrižja (poezija, uglazbljene pjesme, novele, komedije i zapisi) . . . Više o Vlasti Juretić morete pročitat ovdi
Biž ća, živino, naše meso pust... Grobnički dondolaši . . . Ma od sih tih nimotarij kad poludi se krajen, muško, žensko, mladi i stari, najsrdačnije i najteplije pozdravimo ti naši dondolaši. Aš oni su od sega toga najprvi ča su došli od vele putribe još va one stare vrimena se ovo veselji i nimotarije potekli su od njihova simena. Pokla su došla zvona, zgubil se j' naziv stari, tako da dondolaši, prozvani su zvončari . . . . . . Ali ti naši stari dondolaši znali su puno put potirat i ono zlo ko j' zapritilo va to starije vrime, Mlečani, Tatari i Turki... i tako su očuvali našu slobodu i pošteno hrvatsko ime. I sada, kad su dani divertimenta, ne pozabite one besede naših starih: Biž ća, živino, naše meso, pust! Pa lipo va koraju pojijmo, popijmo, pa zasopimo, zakantajmo, ma i zatancajmo i ča lipje i veselije proštimajmo ta naš dragi i veseli Mesopust . . . Autor teksta: Ivan Brdar Grobniški Celi članak morete pročitat Članci o nami Uredil: A.Žeželić
.JPG)
.JPG)
.JPG)
.JPG)
.JPG)
.jpg)
::